唔經唔覺又到會考季節，今年適逢末代會考，班考生壓力特別大，香港電台第二台特別請來煲呔錄製「打氣聲帶」，噚日開始播出。今日開考地理科，港台話，今次係特首首度喺開考期間為會考生打氣，八方以為佢會有啲乜嘢擦鞋減壓之類嘅獨門法寶益吓考生，點知聽落得啖笑。
煲呔同同學仔講嘅嘢，基本上都可以喺教育局同考評局嘅大堆指引裏面搵到，好似自備耳筒收音機、唔好將答案寫出界、記住帶准考證等等。所謂「貼士」，就係最好帶定後備電池、手提唔好響、仲有要有強健體魄之類。煲呔又話，學生唔應該在乎成績高低，但求問心無愧，呢一點同佢向來自稱視民望如浮雲同出一轍。