今年經濟急速反彈，身邊都有朋友買咗遊艇，呢個周末跟佢出海吹吓風，順便去長洲食海鮮。黃金海岸鄉村俱樂部遊艇會老友阿Wing噚日同小妹講，經濟好咗多咗人買遊艇，佢哋下月7日一連三日喺遊艇會舉行展覽會，70幾部嚟自世界各地嘅遊艇大晒冷，其中8日同9日（早上10時至下午6時）開放畀巿民任睇任摸。入場費$20。
最貴展品值7700萬
阿Wing話，今次遊艇展總值成5億，比舊年飆升兩成，全場最貴嘅係台灣中信造船集團嘅Jade95Explorer，天價7,700萬港元。船身長95呎，分4層，係全場體積最大嘅遊艇。船身罕有以鋼鋁打造，內有寬敞嘅客飯廳、獨立廚房同6間房㖭。
阿Wing話，呢艘部Jade號上月底喺高雄試航，前特首董建華同佢夫人都專誠去試坐。佢兩個企喺頂層露天甲板，眺望高雄港內嘅景色，都好滿意部遊艇。咁董生有冇落叠買番部玩具？阿Wing笑笑口話，佢啲私人嘢就唔係好清楚嘞。不過，遊艇展當日，呢部艇會開放畀巿民睇。
遊艇展另一勁艇、被譽為業界「勞斯萊斯」嘅機動遊艇SportRiva56，身價達2,500萬港元，流線外形、開放式設計，型格十足，唔怪得連老牌占士邦007演員辛康納利都追捧啦。城中富豪熱捧嘅英國品牌Sunseeker都有兩艘最新型號亮相，包括價值4,700萬港元嘅Predator84及4,400萬元的Yacht88。計小妹話，買唔起，走去影番張相威吓都好。
電郵：mailto:[email protected]