五區補選下個月先舉行，但港島區候選人陳淑莊提早「重返議會」，今日會以公民黨身份出席立法會工商事務委員會聽證會，力促政府整頓貿發局，以免與民爭利。九龍西嘅候選人佘繼泉亦有機會踏足議會，以中小型企業聯合會代表身份現身，一圓喺議事堂發言美夢。另一重量級人馬係唐唐細佬、香港出口商會會長唐慶年，可惜唐唐唔使出席，否則可以兄弟同場。
八方聽聞貿發局都動員唔少友好團體出席撐場，勢孤力弱嘅香港展覽業發展關注組堅持當場篤爆貿發局獨大嘅弊處，佢哋早前向483個參展商進行調查，結果七成受訪機構認為貿發局急須改善對中小企嘅援助，顯示業界唔多滿意貿發局嘅表現。