下個月9號就係母親節，小妹想請媽咪食番餐好嘢，於是周圍八吓邊間酒店有母親節自助餐嘆，最好梗係有得食仲有得玩啦。
問開背山面海嘅荃灣汀九帝景酒店，公關Coby話，下月8日同9日會推出母親節自助餐巡禮，一口氣提供自助午餐、下午茶自助同自助晚餐畀客人選擇，主打嘅自助晚餐，包括冷盤大海蝦、避風塘辣蟹、蒜蓉蒸越式蝦等，大廚即場炮製蛋白煎蝦餅，每人仲獲一客蟹皇翅，媽咪就額外多一份護膚品套裝㖭。自助晚餐成人價$328，持滙豐、恒生、中銀或渣打信用卡有八五折。另有母親節住宿優惠，入住一晚$998，回贈$300餐飲現金券同水療按摩護理（查詢：37162888）。
Coby又話，佢哋會喺母親節搞兩場「媽媽好煮意」烹飪比賽，惠顧母親節自助午或晚餐同住宿優惠計劃就可以參加，有機會贏得酒店住宿同自助餐禮券。每場名額限10對，反應好會加多一場，到時大廚會親自教煮特色意粉，媽咪煮完可以食番。
總廚教做動物造型點心
尖沙嘴洲際酒店中菜廳欣圖軒喺5月8日早上都有母親節親子點心班，由總廚劉耀輝教囝囝點做動物造型點心，好似玉兔蝦餃、雪人奶皇糯米糍，之後再由媽媽同仔女一齊做點心，再蒸熟畀媽咪嘆。價錢每位小朋友$888，媽媽免費（查詢：23132323）。
電郵：mailto:[email protected]