黃福榮捨身救人，不但感動全港，仲感動全國。噚日新華社發表咗篇題為「『香港之子』黃福榮感動香港感動中國」嘅文章，但奇就奇在文中竟然點名提到《蘋果日報》，仲引述埋本報對黃福榮事迹嘅報道。好多行家打嚟問八方，唔通「阿爺」同《蘋果》「破冰」？
新華社篇文確係罕見，其中講到連日來關於黃福榮嘅報道佔據傳媒顯著位置時，竟首先提到香港《蘋果日報》以「黃福榮，香港以你為榮」為題報道黃福榮事迹，然後先講到《文匯報》、《大公報》嘅報道，再然後先輪到煲呔篇網誌。八方記憶中，自創刊以來，《蘋果日報》呢四粒字從未喺新華社嘅稿件出現過。
《蘋果》記者採訪被截
八方唔識解答行家嘅疑問，淨係知《蘋果》上星期派出記者到青海採訪地震災情，星期四深夜由西寧出發去玉樹途中，架車行咗80公里，去到一個高速公路收費亭時，明明其他行家順利放行，八方嘅同事就被幾個交警同便衣人員截停。對方知道八方同事係《蘋果》記者之後，就話冇災區採訪證唔可以去玉樹採訪，八方同事反駁話按照國務院規定突發災難唔使另外申請採訪證o架喎，對方都唔理，結果八方同事要折返西寧，跟住仲被人跟蹤同勸喻回港。