呢排嘅新聞焦點，離不開青海地震同政改方案，上星期三、四一連兩日嘅財政預算案辯論，前後夾埋接近13個鐘共53個議員先後發言，但傳媒嘅報道唔算好大篇幅。大家唔為意，唔代表財爺鬍鬚曾可以掉以輕心，佢噚日喺網誌度話，聽完議員意見，佢已經立刻準備呢個星期盡最後努力，爭取議員支持。
為咗拉票，鬍鬚曾借鑑煲呔嘅特別嗜好，落足鞋油咁話，雖然唔可能完全同意唔同黨派議員嘅意見，但佢十分尊重佢哋對香港嘅感情，呢個共通點亦係大家溝通嘅基礎。鬍鬚曾已經預咗迎接另一場馬拉松會議，預計星期四下午投票，但佢可能驚辯論收視太低，補飛話市民只要細心聆聽會發掘到當中趣味喎。