噚日係香港首架雙層巴士開出嘅61年周年日子，九巴冇慶祝，一直爭取保留尖沙嘴天星碼頭巴士總站嘅「尖碼之聲」，卻反客為主搞咗個導賞團，同一班「巴迷」齊齊坐61年前第一條九龍雙層巴士路線1號車，沿彌敦道遊覽夜景。
今次負責講解、曾經做過導遊10年嘅尖碼之聲代表林鴻達Jacky話，唔少旅行團都會帶遊客由中環天星碼頭出發，坐渡輪到尖沙嘴嘅天星碼頭，再轉坐巴士到旺角等地方遊覽，噚晚個導賞團行程如出一轍，帶住十個市民試吓做遊客坐巴士遊街滋味，沿途講吓街道掌故；佢指拆天星巴士總站其實無益旅遊業，佢哋希望第二時可以搞多啲導賞團，等市民明白香港特色同保留尖碼巴士站嘅重要性。