【本報訊】今次政改爭議中，泛民及主流民意均要求政府承諾會踢走立會功能組別，行政會議召集人梁振英認為市民之所以討厭功能組別議員，全因他們只顧博取界內選民支持連任，經常忽略向全香港社會問責，認為他們需要檢討。有民建聯功能組別議員也承認，在個別事件上，的確有功能組別議員，將界別利益凌駕香港整體利益之上。民主派成員認為，要解決功能組別議員的問題，唯一方法是盡快廢除功能組別。
梁振英昨日接受新城電台訪問時，雖然仍力撐功能組別，認為應留待社會作深化討論後才作定論，但他也承認功能組別議員認受性受市民質疑，有需要檢討，「有啲功能組別議員，因為經常要聯絡佢哋嘅選民，等下次再參選時可得到支持，有時係忽略咗對全香港社會問責。」
被批無講解決方法
面對梁的指控，本身是區議會功能組別議員的民建聯葉國謙未有完全否認，「有冇咁嘅現象，可能以事件咁嚟講，係有咁嘅可能性」，但他堅持功能組別議員並未有「完全」漠視全港利益，又認為不應以個別功能組別議員表現，說成是全部人的問題，「當然你話某一位，即係三點不露（指銀行界李國寶）或者乜乜，我諗呢啲唔係太過合適嘅講法，大家都有改正嘅地方，但唔好將佢變成成個功能組別都係懶咁樣。」
社民連主席陶君行指出，惟有盡快廢除功能組別，盡快落實雙普選，方能解決功能組別造成社會不公的問題，「梁振英咁講梗係想討好群眾、想做特首啦，但問題係佢只係講出功能組別問題的現象，冇講出解決問題的方法，呢個係佢最大敗筆。」