味丹國際（2317）主打味精產品熱銷，廠房又逐步增產，增長爆炸力好強，要實。味丹09年度（12月底止）純利翻一番到1.4億元，PE大跌至挨近熱爆股阜豐（546）9.6倍水平。仲要咁睇，味丹對上兩年，因為越南廠房環保問題，遭當地政府追收環保水費之餘，廠房亦被迫減產。但經過上年完善廠房環保措施，問題解決。
隨住產能提升，加埋主打產品又係越南熱銷，集團2010年度keep住增長爆炸力。係咁易計數，味丹年度純利翻半番到2.1億銀，預期PE跌到得7倍，吸引過阜豐8.7倍。又味丹最新NAV折讓30%，至於阜豐，P/B已經喺3倍樓上，味丹平佢一大截。以味丹1倍P/B做目標，價見1.37元，到時，今年預測PE都係10倍咁大把。
力寶有位炒波幅
力寶（226）09年度（12月底止）純利得125萬銀咁大把，但集團08年度大見紅3.37億銀，一來一回，業績其實大幅改善。再講，力寶最新NAV9.4元，現價（2.56元）大幅折讓近73%，無論以本地磚頭股、內房股，或者星洲房產股嚟衡量，力寶都係殘得好交關。呢家冷灶，真係值得煲。先嚟轉短打，喺波幅區2.4元至2.99元炒上落，上下限潛在回報率25%。
錢雋