第十四屆人權新聞獎噚日頒獎，《蘋果》得五個獎，可喜可賀。《蘋果》記者貼身直擊80後在羅湖闖關投案撐劉曉波，公安竟然越境拉人，另報道警察濫權，性工作者有寃無路訴，都得到中文報章組優異獎。
尊子獲漫畫優異獎
報章特寫組都奪得兩個優異獎，其中一個由蔡元貴、張嘉雯獲得，佢哋分別訪問被中共以言入罪嘅陳友道，同埋避禍中共偷渡來港做咗市政局議員嘅林澤飄，寫下中共建政60年嘅香港故事；另一獎由陳沛敏獲得，佢報道小三生畫王維林擋坦克交功課，老師卻唔畀分。
去年千人入村撐菜園村，掀起反高鐵抗爭序幕，八方同事馬泉崇憑「反對清拆菜園村」相片獲突發新聞優異獎；另一個攝記孔慶初亦獲優異獎，佢影到陶君行在中聯辦外被帶上警車，妻子孔令瑜在車外哭成淚人嘅感人一刻。八方鄰居尊子作品「孤寡也不放過」則獲漫畫優異獎。
今年中、英文報章大獎分別由《明報》報道綠壩軟件過濾資訊，同《南早》報道泰國秘密遣返羅興亞難民奪得。記協主席麥燕庭話，今屆中文參賽作品有106個，較上屆多成倍，顯示中文傳媒多咗關注弱勢社群，希望行家繼續努力，透過紙、筆、鏡頭，保護人權。