導演李仁港近幾年以製作動作片為主，而且每有新意思，在創作上已給到觀眾新鮮感，而這套《錦衣衞》更加搵嚟「宇宙最強」嘅甄子丹擔正，其實在幕前同幕後，份量都相當唔錯，不過最後電影成績麻麻哋，即使係咁，影碟版推出，仍然係今周好值得一煲嘅影碟！
記者：許福合
部份攝影：黃子偉、許福合
邊行邊隻揪
在戲院上畫我無入場去睇，原先以為係一個老派嘅武俠故事，但睇完影碟又出奇地有新鮮感，故事情節其實好簡單，以明朝秘密組織錦衣衞及朝廷叛變為背景。甄子丹就係錦衣衞首領青龍，忠於君主，因為被陷害盜兵符，而成為被追殺對象，而有啲愚忠嘅青龍，仲想阻止奸臣陰謀，出盡辦法，而一路就引起無盡廝殺！
睇得最爽並非故事劇情，反而係甄子丹與一班大小嘍囉嘅格鬥場口，例如同吳尊鬥完拳腳鬥武器，跟住又輪到同勁玩特技嘅徐子珊隻揪，感覺甚少悶場。
文戲交到貨
講多都係假，相信有留意《錦衣衞》嘅觀眾，十個有八個都為睇甄子丹嘅動作打鬥，若然同之前《葉問》比較，我覺得動作水準比《葉問》更好，最重要係即使係文戲亦交到貨，尤其係一副冷面嘅青龍，甄子丹演落更係合情合理，無乜表情，對落難都唔太在乎，演繹上無以前咁肉緊，但反而更寫意，觀眾更易投入。趙薇亦算係比較搶鏡，而發揮嘅空間亦比較多，至於其他演員，有深刻印象嘅就唔多。反而電影唔少敗筆，在睇碟時更突出，例如徐子珊在演繹動作場面上，明顯唔夠班，硬來之下加上特技，睇落格格不入；還有魔盜王造型嘅吳尊，睇海報仲以為係擔正，要搵佢搞笑，鋪排又不足，可有可無。
後半段試黑位
在戲院上畫時，有人批評《錦衣衞》節奏控制得唔好，高潮劇情竟然早在一半過啲就出現，而後半段嘅時間就變得有啲悶場，睇影碟其實都有類似觀感，不過後半戲份其實可當作試機之用，呢段劇情暗位較多，無論係睇BD定係DVD，畫面相當粗吓，大可用來測試各位對畫面嘅接受極限！正場睇完記得睇埋Bonus，導演李仁港同主要演員都會現身分享佢哋感想，亦有刪剪片段可以睇到，覺得正場唔夠喉的話，記得煲埋Bonus喇！
