政府花錢搞條飛龍出嚟宣傳香港係亞洲國際都會，可能及不上一部iPad顯示香港係電子產品水貨之都咁實際。識途老馬都知道，旺角先達係買最新款水貨手機、手提電腦勝地，連《華爾街日報》都教路，話如果想以較便宜價錢第一時間入手水貨iPad，旺角先達係首選。
《華日》網上版形容喺先達唔係「很容易找到」iPad，而係「很難找不到」，因為賣到成行成市，表面上價錢一樣，16GBWi-Fi版本大約5,180港元，但如果有耐性格價，會發現個別舖頭會平300港元。
《華日》仲教精消費者，如果行上多一層樓，價格會更低，真係早買早享受，行多兩步平幾嚿。香港咁多水貨iPad，《華日》估計價錢好有可能繼續下調，《華日》指「旺角仍然是亞洲低價水貨電子產品的首選地」。