五名立法會議員噚日上台聲援搞咗27年嘅饑饉三十，但原來絕大部份都冇身體力行。立法會主席曾鈺成喺台上話災民點慘點慘，但大會宣讀絕食宣言時就快閃。民記另一要員葉國謙，被問到係咪諗住唔食嘢30小時，亦只苦笑話：「我會號召……我會呼籲……。」
民協馮檢基算最唔話得，噚日病咗都到場，話會絕食24小時，相信會對病情有幫助咁話。最令人意外嘅，係只有8個月大BB仔子浩都參加饑饉。BB老竇梁生向八方派定心丸，話一定唔會餓親BB，皆因饑饉三十准參加者飲流質食品，BB食奶冇影響。佢希望BB大個後明白幸福唔係必然，大會相信子浩係歷來最年輕參加者。