呢日睇報紙，頭版大字標題「星人安居，港人蝸居」，為之嚇了一跳。派記者到星加坡，就係為咗寫呢啲新聞？左丁山好耐冇去過星加坡咯，十六年前去過，曾順道探訪一位大學師弟，佢在當地做事，已成為星加坡人，住在政府組屋，面積甚大，好似有成千四呎，屋邨環境優美清靜，令我哋羨慕不已，但是所謂各有前因莫羨人，星加坡人住政府屋如此舒服，背後付出不少代價，你估香港人肯制咩？例如反高鐵之八十後如在星加坡做同樣事情，一早拉晒啦。在香港反政府、反特區房屋政策，大有自由，但最好千祈唔好引用星加坡例子，話人哋住得幾咁幸福，香港政府就冇鬼用。
用吓腦就知港星差異甚大，不必一一舉例，最簡單嘅例子，就係《蘋果日報》絕對不能在星加坡生存，星加坡報紙係由政府控制嘅。香港人是否可以犧牲言論自由，換取特區政府有星加坡政府咁有行政效率，問吓猛咁讚星加坡政府嗰位女記者，佢唔會答yes啩？
唔講自由咁抽象嘞，不如講番數字，香港面積1,104平方公里，據旅遊局網頁講，香港面積有七成係鄉區、山區、郊野公園、離島等等，用買樓術語嚟講，香港嘅實用面積只得三成，即331.2平方公里，在這面積上，住上705萬人，人口/實用面積即係每平方公里住上21,286人，淨係沙田馬鞍山已住上近六十萬人啦。星加坡又如何，面積697平方公里，全國地面坦平，冇乜山區，近十年來星加坡遇海填海，面積不斷擴大，故此星加坡嘅實用面積估計接近七成，即487.9平方公里，人口465萬人，人口密度/實用面積係每平方公里住上9,530人，只係香港嘅45%，調番轉頭計，香港人口每千人佔用0.047平方公里（實用面積），星加坡每千人佔用0.105平方公里，係香港嘅2.23倍。好嘞，星加坡組屋平均面積968平方呎，香港公屋面積平均430平方呎，新加坡係香港2.25倍，老實講，比例上差唔多啫噃，有乜稀奇，點解會成為頭版，頭條新聞？木宰羊。一啲唔肯計數嘅評論員，立即以此「新聞」揚星貶港，奇怪也。即使左丁山對星加坡之實用面積估計有偏差，星加坡之面積/人口比例一定高於香港。星加坡現繼續填海，填到印尼、馬來西亞唔肯賣沙畀星加坡，香港仲可以填海咩？