四大唱片公司環球、華納、Sony、EMI同無綫之間嘅歌曲版稅問題仲未解決，直到今時今日雙方仲喺度互相封殺，其中鄭伊健因係Sony旗下歌手，所以都喺封殺名單之內，暫時都唔可以喺無綫見到佢。噚日伊健同余安安、劉浩龍、24味等人去到美孚接受RoadShow嘅訪問，宣傳新戲《飛砂風中轉》，問到伊健會唔會用演員身份去無綫宣傳一下？伊健話自己都好迷惘喎！佢話：「我係四大公司，但同時亦係無綫嘅合約演員，有試過問，但知道係唔可以去TVB，人哋已經拒絕咗我哋，但係點解呢，我都係無綫嘅藝員，有部頭合約。」
仍有部頭合約
雖然伊健表面笑騎騎，但擺明佢係出言寸無綫，講到會唔會係因為伊健唔係無綫親生仔，只有部頭合約，所以無綫都唔會放生佢？伊健話：「咁話晒我都係簽畀佢哋，反而同佢哋冇約嘅陳小春仲可以亮相，真係好奇怪，我都好想搞清楚。唔通佢哋已經唔記得我有合約？」如果真係唔記得，咁伊健咪唔使向無綫還劇債？伊健聞言笑笑口話：「係喎！我都想查清楚，我仲未收晒錢喎！雖然我係歌星，但都係一個演員。」
同場嘅余安安就喺戲中做伊健媽咪，佢都坦白話初初擔心感覺出嚟好老，角色又醜又粗魯，但係佢同導演都認同出嚟感覺真係好爆囉。