雖然《荃加福祿壽》的扮嘢環節和亞視之前的《香港亂噏》近似，不過《荃》的收視卻遠遠拋離，上周六最高收視達32點，即有204萬觀眾捧場，汪明荃昨日率領王祖藍、阮兆祥和李思捷認叻祝捷。難怪祖藍現身鬧市時即被身高相若的小朋友狂圍。
無綫節目《荃加福祿壽》收視理想，汪明荃（阿姐）、王祖藍、阮兆祥和李思捷扮嘢扮到街知巷聞，上周六平均收視有30點（約191萬人）收看，最高達32點（約204萬人），創下近兩年周六晚黃金時段的收視紀錄。
昨日眾主持在將軍澳舉行祝捷會，並公佈添食13集，三位男主持聞訊即跪拜阿姐搞氣氛，祖藍搞笑說：「阿姐家鍾意攬我，唔鍾意攬家英哥啦。」
不覺教壞人
對於要添食拍多13集，阿姐說：「我6月要開劇，唔可以叠時間，開完劇就冇問題。」不過阿姐不忘大讚祖藍、祥仔及李思捷扮嘢技巧抵死鬼馬，但提到祖藍被批評教壞細路，阿姐則表示未有聽聞。談到王祖藍常扮女人頻呼驚難搵女友，阿姐說：「宣傳啫，佢啲才華好多人都羨慕，佢好叻仔。」至於會否提議羅家英上節目，阿姐說：「佢唔喺香港，喺內地拍戲，我哋會用視像溝通，節省電話費。」
祖藍引細路
王祖藍獲悉節目加開，表示會嚴陣以待，緊貼娛樂要聞，每日看幾本雜誌，他又透露7月會有一個個人騷，他在祝捷會後又趕到將軍澳中心進行街訪，吸引大批妹妹仔和小朋友圍觀，王祖藍不時笑到彎晒腰，心情勁high。
採訪、攝影：卓寶花、楊浩賢、羅德光
