十年人事幾番新，Twins成員蔡卓妍（阿Sa）和鍾欣桐（阿嬌）近年分別受瞞婚和淫照事件拖累人氣，二人仍風雨同路，昨晚合體開騷，阿嬌表現緊張，跳舞出現錯亂情況，向來阿嬌的甲組腳都是短裙大忌，但她昨晚蠱惑出奇招，甫開場穿上兩款鴛鴦色絲襪，掩眼法瘦腳。
組合Twins為紀念成立10周年，昨晚在紅館舉行一連三場的「Twins人人彈起2010演唱會」。01年出道時未夠20歲的o靚妹仔蔡卓妍（阿Sa）和鍾欣桐（阿嬌），以賣可愛冧爆fans，但隨着兩位成員近年先後陷入淫照和瞞婚的經歷，Twins昨晚終排除萬難合體演唱挽人氣，分別27歲的阿Sa和29歲的阿嬌在舞台上表現份外落力，表演勁歌熱舞耍功架。
阿嬌換衫論論盡盡
昨晚8時45分開騷，阿Sa和阿嬌披銀色斗篷出台，大唱《我們的紀念冊》，開騷初段阿嬌的表現略見緊張，不但除下斗篷時動作論盡，要拍檔和工作人員上前幫手，當唱快歌時，阿嬌的舞步卻有點不上情況。
阿嬌在綵排期間一直被攻擊甲組腳，她曾誇下海口表示上陣時一定有方法讓大家眼前一亮，果然她昨晚甫開場跟阿Sa便穿上兩款鴛鴦絲襪表演，阿嬌奇招出術扮幼腳，令觀眾產生錯覺。
Twins稍為熱身即大唱串燒歌，她們則玩招牌側手翻又跟穿紅色bratop的性感女舞蹈員邊跳勁舞配合，最後更擺出叠羅漢甫士，這個環節前日綵排時，有兩名女舞蹈員一度失手跌下受傷送院，幸沒大礙，舞蹈員更凌空把阿Sa和阿嬌拋來拋去。
華仔安慰瞞婚阿Sa
經過不少風雨，瞞婚後首度開騷的阿Sa猛問歌迷：「你哋有冇掛住我哋，我哋冇喺度4年啦。」直至聽到台下歌熱烈回答，Twins也大感安慰，阿Sa又大讚舞蹈員下了苦功演出，她說：「畀掌聲佢哋，有啲仲受咗傷，阿嬌為咗演唱會都出咗好多力。」
同樣瞞婚的劉德華，昨晚預錄了片段撐Twins，他說：「之前的日子大家都唔好過，大家要互相支持，我要講，我係支持Twins。」
王祖藍早前曾扮嘢大玩阿Sa，他昨晚親帶兩束鮮花上台跪謝，阿Sa豪氣的說：「我有乜風浪未見過。」全場拍手支持。阿嬌笑指自己受唔起，阿Sa說：「你哋咁高咁大。」言語間揶揄王祖藍和阿嬌高度相若。
同屬英皇的陳偉霆（William）、王祖藍和鍾舒漫等空群出動撐師姐場，而周麗淇和容祖兒媽咪，以及部份家長帶小朋友到來欣賞。
採訪：胡比 攝影：黃偉雄
