【本報訊】猛虎不及地頭蟲，由「地膽」推介本港景點和美食，旅客更受落。旅遊發展局遂擴大「老友記計劃」，廣邀18歲以上自認「地頭蟲」的市民，代表香港接待旅客，當這些「過江龍」的老友記。
當老友記半年的Canny周日便到尖沙嘴或山頂的旅客諮詢中心為旅客解疑難，往往提供不少例牌以外的旅遊建議，「叫佢哋睇搭棚，外國絕對睇唔到。」因她正職是城市設計師：「外國人好鍾意睇呢啲嘢o架，我仲叫一個法國攝影師去灣仔影電車、舊樓。」
老友記計劃推行半年
自認老香港的室內設計師Allan退休後生活更忙碌，因忙着招呼旅客，更推介行山路線予旅客：「例如龍脊，我成日行好靚o架。」他也遇過尷尬場面，「有個西班牙男人指住佢體形比較大嘅女友，問邊度買到啱佢着嘅內衣。」
旅發局總幹事劉鎮漢說，計劃推行半年來，29名老友記共招待32,000人，計劃會擴大至60人。市民對香港有認識、中英文良好可參與，獲選需接受培訓，完成每節服務可獲120元津貼。申請登入網址 http://www.avs.org.hk/hkpals/cht。