保皇黨議員不識抬舉，揚言杯葛《城市論壇》，從政嘅人如此冇風度、無氣量，佢哋自願減少喺螢幕出現，八方不得不承認，其實係港人之福，希望佢哋放下成見，考慮接納八方建議，無限期杯葛《城市論壇》，港人幸甚。
正所謂一雞死、一雞鳴，有人唔敢面對群眾，亦有人欣然赴會。《城市論壇》聽日討論政改方案，有建制派人士答應出席，包括人大代表譚惠珠、政制局長林D9及全國政協劉夢熊都願意登壇。珠姐久經戰陣，劉夢熊戰鬥力強橫，加上人肉MP3林D9，真係對付維園阿哥「夢幻組合」。
泛民方面由兩女將上陣，分別係白鴿黨卿姐同公民黨黨魁余大狀，兩個都係牙尖嘴利女強人，與建制派「夢幻組合」較量，令人十分期待聽日嘅《城市論壇》。監製兼主持謝志峰話會用新安排控制秩序，並會加派三個制服保安人員在場，所以唔擔心失控，佢透露應邀到場嘉賓冇特別要求，「林局長乜嘢場面未見過，實唔驚啦！卿姐就話要確保佢人身安全，呢方面完全冇問題。」
劉夢熊話未驚過
劉夢熊則同八方講，建制派議員杯葛《城市論壇》似乎有點示弱於人，「議員係公眾人物，有乜理由害怕面對群眾？」佢話自己幾十年前游水落嚟香港，「鯊魚、狼狗、邊防軍，乜嘢未見過，幾個維園阿哥啫，使乜驚呀！」
《城市論壇》人人動口不動手，劉夢熊認為根本冇需要新增措施分隔現場觀察同台上嘉賓，因為政見不同係好自然、平常嘅事，互罵、爭執、辯論冇乜大不了，可以令節目更有可觀性，何樂而不為？恥笑建制派玩杯葛係反應過敏，無大將之風，「極其量都係文鬥，咁都驚嘅話，佢哋咪要着避彈衣、戴頭盔出街！哈哈哈！」
「維園阿哥」任亮憲亦指杯葛係幼稚行為，堂堂議員咁做法，表現好唔成熟，好似小學生咁發脾氣扭計，令人莫名其妙，「佢哋連市民少少質詢都面對唔到，真係枉為議員。」
mailto:[email protected]