保皇黨揚言唔玩《城市論壇》，原來僅一撮人所為；民建聯話唔參加公投，亦都係吹水。新東候選人胡世全，噚日喺浸大舉行嘅選舉論壇上，自爆係民記黨員，剛於今年2月中退黨。據胡世全講，佢係獲一名民建聯元朗區議員拉攏06年入黨，相信係睇中佢經常喺天水圍做街坊服務，「佢覺得我好合資格，所以批准我成為贊助會員。」胡世全活躍黨務，參加過民建聯年會、新春團拜、演講會同論政飯局等等，不過佢堅稱並非黨員，只係「贊助會員」。根據民記資料，贊助會員都算係黨員，但冇投票權。
冇交代退黨原因
胡世全又解釋加入民建聯原因，「我作為香港市民，都想了解香港個政制。」又指「民建聯喺建制派入面，係比較親中，我好想了解吓。」至於退黨係因為了解而分開，抑或為了參選，佢冇交代。噚日論壇僅長毛同胡世全出席，其餘兩個候選人周澄、陳國強甩底，兩人都因病缺席。陳國強日前聲稱有六四政治暗殺名單，仲收錢整炸彈，八方要求警方跟進，唔知做咗嘢未呢？