張愛玲遺作TheFallofthePagoda（《雷峯塔》英文原著）面世，取材自佢4歲至17歲生活。張愛玲遺產執行人宋以朗話，白蛇傳嘅白蛇被困雷峯塔，魯迅喺1924年寫過《論雷峯塔的倒掉》，將雷峯塔喻為舊社會，而《雷峯塔》女主角Lute嘅父親食鴉片，母親係留學生，Lute喺新舊夾縫下成長。
《小團圓》面世有爭議，宋以朗解釋再出張愛玲遺作原因，「如果今次我唔出，又會畀想睇嘅人鬧。」佢話張60年代喺美國好想出呢本書，可惜出版社以冇市場拒絕。文化雜誌《瞄》主編林沛理稱，張愛玲沉溺童年創傷幾十年，可能係自我療傷，《雷》可視為張愛玲病歷，有助讀者更了解佢。
宋以朗9月會出埋《雷》下半部TheBookofChange（《易經》），之後又有《張愛玲私語錄》結集張同宋父母嘅書信、講過嘅300句名言等；明年仲有《張愛玲書信全集》。至於關於張學良同趙四小姐嘅愛情故事，由於張愛玲寫咗70頁就冇下文，「呢本唔會出，所以應該冇小說再出。」