杜麗莎（Teresa）將於下月16日及17日在紅館舉行演唱會，今次由她與丈夫一手包辦製作，誓要炮製一個愛心洋溢的演唱會。她更會全家總動員上台表演，將她一生的經歷搬上舞台，為歌迷帶出正面訊息。
杜麗莎與林子祥三年前一齊舉行演唱會後，一直感到未夠喉，心思思想再做演唱會，今次她終於決定自己一腳踢製作一個屬於自己的演唱會，她日前接受本報記者專訪時說：「我第一次自己搞演唱會係83年，當時唔係好成功，蝕咗好多錢，有咗經驗，今次有信心咗好多。我都同老公商量過，佢都好支持我，所以就放心去做。」
重演失婚經歷
Teresa表示今次演唱會以四季作主題，會將她這四十多年來發生的事搬上舞台，想帶出人生就好像四季，循環不息，Teresa說：「就好似我嘅人生咁，雖然發生過唔愉快嘅事，好似經歷咗一段失敗嘅婚姻，但唔會自暴自棄，之後遇上家嘅老公，過得好開心，有好多美好回憶。」
Teresa要令歌迷感到這是一個滿載幸福的演唱會，所以出動全家人的力量，她說：「到時我大女會上台表演，仲幫我排舞，我老竇都會上台打鼓，另外兩個女就會唱歌，當然唔少得我一班學生。」
今次Teresa的丈夫會負責很多製作上的工作，問到兩公婆會否因而有爭拗？Teresa坦言：「都有o架，不過只係限於開會嘅時候，一返到屋企就唔會再傾公事，我大前提係唔可以影響到夫妻感情，唔係我寧願唔做。」
努力減30磅
為了今次演唱會，Teresa還積極減肥，已經減掉20磅，她說：「希望可以減多10幾磅，要以最佳狀態表演畀觀眾睇。」
採訪、攝影：胡比
場地提供：天喜磯味酒處