金融海嘯對許多人來說是噩夢，對Ben和Man兩兄弟來說是個重生機會，原本經營家族珠寶生意，因一場風暴反而變成刨冰大王，短短一年多分店擴展至11間，勢估唔到賣刨冰好賺過賣鑽石喎！
記者︰黃家欣
攝影︰譚盈傑、黃子偉
場地：糖百府（旺角黑布街99號地下28666380）
煮一個月芝麻糊
兩兄弟外貌不太像，連性格亦南轅北轍，哥哥阿Ben鬼馬健談，弟弟阿Man永遠默默搓着手上的粉糰，叫他出鏡做示範，即刻推阿哥上前。不過兩兄弟同樣愛下廚，以前打理家族珠寶生意時，亦不時在家煮餸宴請親朋，「反而現在在家甚少入廚房！」阿Man笑說。
一場金融海嘯，原本轉攻美國珠寶市場的生意被迫結束，「那時我覺得自己才三十歲出頭，再出來打工並非不行，但始終都做開生意。」阿哥靈機一觸即鎖定開糖水店，結果再次證明眼光獨到。第一間糖百府開業前，兄弟二人足足做了半年Research，「有朋友話台灣有棉花冰，我們就專誠飛去試。」之後還走去烹飪學校學煮傳統糖水，回來不停研究、改良配方，單單講一道芝麻糊，阿Man足足對了一個月，不停煮不停諗有甚麼辦法做得更好食！煮足一個月芝麻糊，聽到也覺得悶，更意外是阿Man此時開口說，「我本身唔食甜嘢，為了開舖才試多咗咋！」要成功便要付出。
古老時興雙線發展
其實棉花冰不算新鮮事，之前都有人試過引入，就是未能像糖百府帶起熱潮，「香港人做生意太懶，甚麼都靠現成產品，煮埋一碟就賣，不求質素，只講本小利大。」為開糖水店，二人幾乎食勻全港甜品店，「有沒有發現好多糖水店其實都係賣那幾種糖水，好少人會發掘新產品，今次成功引入棉花冰，建立品牌，其實仲開心過賺大錢。」
糖百府最出名賣冰，居然可在冬天開分店，全因老闆古老、新潮雙線發展，一面開發新口味棉花冰，今季就推出Wasabi冰及辣椒冰；另方面傳統糖水亦做到精益求精，每款經阿Man鑽研過的糖水，食得出花了不少工夫。坊間好多小店會將酒釀丸子放入大煲邊滾邊賣，但阿Man說丸子會失去彈性，所以堅持即叫即做，出來還特別有酒香。唔好以為糖百府賣棉花冰只是噱頭，見他們長做長有就知有真材實料。
酒釀丸子
00hr30min
製作難度：★★★☆☆
份量：2人
即叫即煮的酒釀丸子，酒香特別濃，而且有芬芳的桂花香，食落清甜滋潤。
材料
糯米粉300克、水200毫升、砂糖100克、桂花20克、酒釀20克、米酒100毫升、馬蹄粉10克
做法
1. 將水逐少加入糯米粉搓勻成軟滑麪糰。
2. 取出少許麪糰，放於掌中搓成小丸狀。
3. 開大火煲滾水，將小丸子放入灼熟，然後撈起瀝乾。
4. 開大火煲滾另一鍋水，放入砂糖煮溶後，加入桂花及米酒，熄火後下酒釀，最後放入丸子。
5. 馬蹄粉加少許水拌勻後倒入（4）中，開慢火煮滾，上碗後灑入少許桂花即成。
熄火落酒釀唔變酸
阿Man炮製的酒釀丸子，爽滑得來清甜芳香，原來有兩大秘訣！首先丸子搓好後要先用滾水煮熟，再放入糖水煮，避免放入糖水煮得過久而變腍，失去口感。還有酒釀記得要熄火後才落，然後加入其他材料再煮滾，因為酒釀不能受太熱，煮得過長時間亦會變酸。
麻甩湯圓
00hr30min
製作難度：★★★☆☆
份量：2人
由傳統糖不甩演變而成，加入芝麻漿成為黑色的湯圓，入口帶芝麻香氣，煙韌中帶爽滑口感。
材料
糯米粉300克、黑芝麻200克、片糖2片、綠茶粉/桂花/玫瑰花/椰絲各適量
做法
1. 將黑芝麻放入白鑊炒香後，加少許水磨成漿。
2. 將芝麻漿加入糯米粉，搓成軟滑麪糰。
3. 將麪糰搓成湯圓；開大火煮滾水後放入片糖煮溶。
4. 將湯圓放入煮至浮面後，再浸片刻，撈起即可上碟。
5. 綠茶粉拌入椰絲、桂花及玫塊花，灑上芝麻湯圓即成。
撒手鐧凉粉棉花冰誕生公開
材料：
凉粉冰1磚、煉奶/紅豆/八珍珠各適量、西瓜粒10粒
做法：
1.將冰磚放入刨冰機刨成冰片。
2.放入八珍珠、紅豆、西瓜粒。
3.最後淋上煉奶即成。
