陳茵媺擔演烈女角色入型入格，剛柔並重的演繹令她名利雙收，獲獎之後，聲價也不斷提升。陳茵媺事業正扶搖直上之時，她竟然大呼：「好怕冇得做！」陳茵媺還趁機表達她演厭了烈女，想轉型扮演情緒化的女孩，挑戰演技。
陳茵媺自06年當選港姐冠軍後，在無綫發展機會不俗，其間剪了一頭短髮，形象大變備受注目，去年憑無綫劇集《烈火雄心3》中飾演剛烈女警，主動追求黃宗澤，入型入格的演出，在無綫台慶頒獎禮，以一面倒的姿態奪得飛躍進步女藝員獎，尤其令人最深刻是獎項到手時，陳茵媺激動致謝，吐露心底裏的女人心事。
激動捧獎真性情
男仔頭的外表，令人誤會陳茵媺現實中也是個烈女，她趁機反駁：「攞獎當時係我嘅真性情，想喊就喊，幕前咁強嘅我，同真實完全相反，我只係比較鍾意運動，同埋我唔會主動追男仔，鍾意男仔追我。」得獎獲認同後，令陳茵媺名利雙收，同時也背負不少壓力，她說：「得獎之後會更加想做好啲，好有滿足感，家多咗人識我，搵錢機會多啲，相對酬勞都提升咗，我拍劇實際差不多兩年就拎到獎，對我嚟講係好大嘅鼓勵。」未來陳茵媺渴望擔演情緒化角色挑戰演技。
拍劇再戀黃宗澤
近期陳茵媺再次夥拍黃宗澤演情侶拍攝新劇《讀心神探》，被公司打造螢幕情侶，陳茵媺對此加以避忌，還說：「兩套啫，我哋係比較熟絡，但唔會傳緋聞，我鍾意文靜嘅男仔，亦唔係咁易追o架，暫時都冇諗過要拍拖，有得做想做多啲，賺多啲錢，我好怕冇得做！」由加國回流香港發展，陳茵媺現時操一口流利廣東話，她不忘多謝處境劇《畢打自己人》中的演員，稱呼大家為老師，她更與鄭欣宜和毛舜筠成為閨中好友。
採訪：卓寶花
