泰國紅衫軍示威多日，突釀成流血衝突。四月十日晚上軍民在街頭大戰，二十一人喪生，八百七十四人受傷，係一九九二年以來最大一次政治性死傷事件。左丁山對泰國有特殊感情，心為之悲，為之危，急急打電話搵泰國朋友C問吓，朋友C話泰國已經分裂成兩大派系，紅衫與黃衫互不相讓，事實上已成內戰之局，紅衫軍示威者霸佔清邁與孔敬市政府機關，市政府陷於癱瘓。軍隊之中，負責維持街頭秩序嘅被稱為「西瓜兵」（綠衣紅心），故此遲遲不肯鎮壓、驅散人群，呢次出手開槍嘅，係第二軍軍人，聽命於陸軍副司令帕拉育，帕拉育係「菠蘿兵」（綠衣黃心），與樞密院之炳將軍關係密切，故此肯「笨人出手」，第一軍係最大軍團，司令官行將於九月退休，預料由帕拉育接棒，目前第一軍按兵不動，海軍空軍不表態，所以阿披實是否真正得到軍方支持，戀棧不去，實屬疑問。
朋友C話：「泰國無論誰人上台執政，貪污陋習難改，只有貪大貪小之別及是否收錢後能否交到貨；他信幫倒台之後，新政府最弊就係做唔到實事，令紅衫軍有可乘之機。」
左丁山以前曾反對黃衫軍示威反政府，為此與泰國朋友透過電郵筆戰。左丁山嘅泰國朋友全是曼谷中產專業人士，佢哋恨透他信貪污，在農村買票。左丁山就話要搞好民主，必須尊重人民的選擇，既然他信一派佔壓倒性大多數，你哋唔高興都無符，畢竟曼谷人口雖多，係全泰國精華所在，但曼谷人係總人口嘅少數，總唔能夠以曼谷角度，忽視農民訴求嘅啫，曼谷精英認為農民無知，教育程度低，易受政客欺騙，不肯承認選舉的公平性與公正性，發動上街示威趕他信幫，表面上係爭取民主，實質上係反民主。黃衫軍以此方法趕走行事，今日紅衫軍照辦煮碗，誓要趕走阿披實，以暴易暴將泰國推向內鬥邊緣，追緣禍始，應該係林明達（Sondhi）等人之過！泰國人自一九七三年至今，共三十七年，以鮮血爭取回來的民主選舉制度，毀於○八年黃衫軍上街之日，亦云慘矣！