終於等到內地公佈首季經濟數據，增長高達11.9%，係07年第二季以來最大，而且一如所料，通脹稍為回落，CPI僅升2.2%；工業生產回升，全國工業增加值升19.6%，當中重工業增速兩成。
中央收緊銀根控制通脹大前提下，貨幣供應量增速回落、通脹受控，卻又未有打壓經濟高速增長。到底盤數咁靚係低基數效應，定真係咁理想？要立體啲睇中央有冇「大隻講」，可從用電量着手。
早一日公佈嘅全國用電量，早已反映復蘇動力的確好強。根據國家能源局數字顯示，3月全國社會總用電量為3435億千瓦時，按年增長21%，特別係春節過後，工業生產全力提速。首季工業用電按年增長27.6%，當中以採礦、製造業及重工業需求特別大。
經濟同用電量關係非常直接，不過投資者近期選股只着眼於受惠人民幣升值嘅內銀同保險股，真正跟經濟運行嘅電力股，反因升得慢而冇乜人理。
用電量回升助脫困
受價格管制影響，內地電廠盈利長期受壓，煤價升更令經營成本有增無減。例子有今日出業績嘅中國電力（2380），08年因為煤價令成本大升72%，業績見紅。大唐發電（991）早前發盈喜，料去年利潤升1.2倍，咪以為好巴閉，咪又係基數低同用電量回升所致。
咁多電廠中，受原料價格影響較細係華潤電力（836），因為自己有礦減少對市場依賴。不過，點都係假，唔想電廠蝕錢，最實際係盡快加價。
電煤價格喺年頭狂升一成之後，西南又遇大旱，有傳五大電企已再度要求上調電價。中國價格協會更話，電企負債率已超過八成，再唔俾加價，不出兩年就資不抵債。
既然通脹已受控，成品油價都可以調升，冇理由電費一直冇得加。電力板塊已調整不少，長線投資分注吸納係時候諗諗。
胡孟青