早前嚟過香港宣傳《愛的抱抱》寫真EP，標榜童顏巨乳嘅台灣女星瑤瑤，近日因為封胸令到佢嘅人氣下滑。為咗挽救事業危機，所以就對外宣佈同拍拖日子都唔淺嘅男友劉建忠斬纜，不過實情係佢哋假分手，兩人改玩地下情。
男友帶傷陪伴
瑤瑤上周二（6日）喺台灣就俾人見到同近排隻腳受咗傷嘅男友喺埋一齊，劉建忠寧願一拐一拐都要陪瑤瑤帶住愛犬去睇獸醫。而且喺診所時兩人情不自禁咁好鬼親熱，又旁若無人四目交投咁傾偈，令人覺得佢哋分手只係煙幕，唔想影響瑤瑤喺宅男心中夢中情人嘅地位。
其實自從瑤瑤話想轉型做鄰家女孩兼封胸之後，佢嘅經理人公司就不停對外放風話瑤瑤工作量大，所以同男朋友聚少離多感情轉淡等等，事實上佢哋的確出現過拗撬，不過就未至於要鬧分手。經理人公司咁做只係希望破釜沉舟。因為自從封胸後加上台灣出現不少走同一路線嘅女仔好似舒舒、豆花妹等競爭對手，令到瑤瑤人氣已經大不如前，為咗留住宅男fans嘅心，佢哋惟有宣佈分手，點知都係俾人踢爆講大話。
