代表無數愛國愛港兼愛黨人士發聲嘅維園阿伯，多年來一直係民意領袖、平民喉舌，一班維園阿哥竟然踩入阿伯地頭，喺《城市論壇》上公然指罵保皇派人士、建制派議員，雀巢鳩佔搞到維園阿伯無碇企，十分離譜，難怪建制派要杯葛《城市論壇》，向港台說不。
維園阿伯自由象徵
需知道維園阿伯係香港言論自由象徵，殖民地年代尚且容得下佢哋盤踞維園大鳴大放，想不到回歸後人民當家作主，維園阿伯卻要靠邊站，八方本着雖然我不同意你說的話，但我誓死維護你說話的權利呢個人道原則，嚴正要求港台即時整頓《城市論壇》，還香港社會河蟹，禁止草泥馬橫行。
保皇黨議員擔心出席《城市論壇》人身安全受威脅，港台應該考慮將論壇他遷，免得維園阿哥衝擊嘉賓，況且康文署轄下又唔係只得一個維園可以開壇，實情大把地方選擇。港島區首選動植物公園，嗰度有多個巨型獸籠，安排保皇黨議員坐在籠中發言，八方保證，無論講乜都百分百安全，掟蕉飛bra固之然唔使怕，榴槤飛埋嚟面前都不動於色。之不過保皇黨埋位前要清場，逼珍禽異獸聽佢哋講嘢，縱使唔係人話，恐怕都有虐畜之嫌，港台同康文署不可不察。
另一個場地，八方推薦位於大西北嘅濕地公園，該處遠離繁囂，水天一色，最宜坐低飲杯茶、食個包，暢論家事國事，而且此處乃都市神獸貝貝之家，好多人去濕地公園都係想親眼睇吓香港罕見嘅灣鱷，香港獨特政制下嘅怪胎功能組別議員，稀罕程度媲美灣鱷，仲冇咁容易絕種㖭。
移師禮賓府顯開明
若嫌濕地公園長途跋涉，禮賓府亦係好地方。眾多周知禮賓府係BBQ開P好去處，《城市論壇》在此舉行，既顯示煲呔政府與民同樂雅興，亦體現特區政府開放透明施政作風，真係一舉兩得，港台仲敢胡作非為聯同反中亂港分子搞搞震？不過講到底，最好都係去西環，嗰度有阿爺睇場，說話寧舍風凉。
mailto:[email protected]