夠Car事：集體回憶上身　MINI變紙杯

有人話MINI造型古怪，有人就話佢夠潮夠獨特，一班理大設計系學生就大讚佢可塑性極高。幾個同學仔以童年回憶為主題，為一個名為「HAPPIESTBITSEXHIBITION」嘅活動而將MINI化身成校巴、白兔糖、雪糕車及茶餐廳紙杯，睇住佢哋多個月嘅努力成果，無可否認，唔係MINI，仲有邊架車可以Carry到咁多唔同主題嘅得意造型呢？

記者：許維雅　
攝影：陳盛臣

今次展覽有四架唔同主題、顏色嘅MINI，藉以帶出兒時唔同階段嘅快樂時光。當中以主題為《Join》嘅橙花圖案MINI最得我歡心。熟口熟面嘅圖案，靈感來自茶餐廳舊式紙杯，設計帶出一班朋友於茶餐廳聚腳吹水嘅快樂時光。其實呢隻紙杯仲有另一意思，同學仔Malou認為：「每個小朋友都有玩過紙杯當電話嘅傳聲遊戲，可以話係成長必經階段。」唯一美中不足就係準備唔到一架啡櫳Cabrio，佢哋話家變咗齋啡。

七個月心血結晶

促成今次POLY同MINI嘅合作計劃，其實係一班理大設計系學生嘅一個Project，有幸行到最後一步可以實戰搞展覽嘅有Malou、Joe及Karen，「開頭對MINI嘅認識唔深，慢慢上網查資料，先發現原來鍾意MINI嘅車主都係貪佢玩味夠重，所以我哋都想以開心為題，最後決定用兒時開心回憶帶出成個設計主題。」由開始時5組人參加，到後期剩低16個Idea經POLY及MINI篩選，看似輕鬆簡單嘅設計其實已經花咗七個月心血，「無論設計、搵場地、佈置擺設、印宣傳海報等，都係我哋一手包辦，打電話報價都有排打，再要畀MINI拍板，的確花咗好多時間，好彩過程總叫暢順。MINI又真係肯出錢畀我哋搞，所以我哋好想把握呢個實戰機會。」除咗時間，呢個展覽所花嘅金錢亦唔少，「最難係控制Budget，佢哋開頭Set咗10萬蚊Budget畀我哋，好多嘢都要計數，有啲Idea被迫放棄，但由於傾價錢嘅最後一步都係MINI做番，所以實質花咗幾多錢都唔知。」用金錢同心血造就嘅快樂，會喺又一城，等你感受。