高鐵喺一片喝倒采聲中獲得撥款，在一片爭議聲中上馬動工，港鐵今日推出全新廣告宣傳片，新口號係「用心為你鋪路、接通未來每一程！」希望用新廣告打造新形象，為強收菜園村、毀人家園建高鐵嘅負面形象洗底。
以前「地下鐵路、為你建造」，香港人真係越搭越有感情，但經高鐵一役，家再講呢句口號都冇人信啦，所以港鐵轉sell溫情。新宣傳片以一位母親做主角，為人母者相信「多條路、多個機會」，所以落力為子女未來鋪路，畀女兒參加好多課外活動，培養唔同興趣，希望發掘子女潛能盡展所長，呢個主題背後寓意港鐵不斷開拓新路線，目的係令港人有更好發展。
廣告仲有兩個情節，分別係小女孩搭高鐵到武漢，代表香港出戰全國體操賽，同埋小朋友搭港鐵到西營盤返幼兒園，用嚟宣傳港鐵興建高鐵同西港島線，可以令市民輕易捉緊更多機會同理想，衝出香港到達目的地。港鐵公司總經理（市場及車站商務）楊美珍指，新一輯廣告以人性化手法表達父母盡力滿足子女理想，正如港鐵透過不斷擴展鐵路網絡令乘客夢想成真。
菜園村關注組：莫大諷刺
做父母嘅當然想仔女夢想成真，但點都唔會使出逼遷強拆呢啲手段去為子女鋪路，菜園村關注組主席高春香指港鐵一味強調新鐵路帶來夢想，毀人家園，破壞人哋安居樂業、落葉歸根心願等唔光彩嘅事絕口不提，對被迫離開家園嘅菜園村居民，受高鐵工程影響嘅大角嘴街坊，睇到呢個「用心為你鋪路」廣告真係莫大諷刺。
呢個洗底工程，據講使費幾百萬元，對港鐵嚟講真係濕濕碎之至，花啲錢為自己塗脂抹粉堆砌新形象，八方唔知有幾多人接受，其實港鐵想洗底，提供多啲優惠畀長者、弱勢社群仲實際。八方其實係支持港鐵洗底嘅，建議用「支持更生，共建安穩社群」呢句口號，懲教署沿用多年，聽講好有效。
mailto:[email protected]