喀麥隆中場桑治喺講求技術嘅阿仙奴陣容中，腳法可能係最水皮嘅一個，不過憑佢肯拼爛打踢法，今季終於成為兵工廠主力成員之一；場內如意，原來桑治家庭生活都十分美滿，年僅22歲，已經係兩個囝囝嘅老竇。
桑治之前喺個人專訪度講，自己咁鍾意家庭生活，原因係自己嚟自一個大家庭，佢仲話自己有17個姊妹、同10個兄弟。大家唔係眼花，佢真係講自己有27個兄弟姊妹；假設桑治阿媽一個接一個生，都要由20歲生到48歲，認真好生養。
桑治憶述：「以前好開心o架！就算家成家人都好親密。如果我有咩需要，只要打電話畀我一個兄弟，佢哋就會即刻嚟幫手。」桑治18歲就由法國嘅巴斯蒂亞轉投阿仙奴，當時連英文都唔識，每日踢完波就返酒店，完全自閉咁；好彩半年後佢女友奧莉華拉（Olivia）由巴黎飛到倫敦陪佢，之後結埋婚，仲生咗兩個小朋友路倫（Nolan）同基利安（Kaylian），大仔路倫家已經3歲。
憶起爸爸會落淚
桑治話：「囝囝嚟睇我比賽，會畀我好大動力，佢哋喺我心目中好重要。」不過，咪睇桑治家名成利就，其實仲有一個死穴，就係爸爸。喺桑治3歲嗰年，佢爸爸就去世；媽媽為咗生活，到桑治8歲嗰年就舉家到法國投靠親戚。直到13歲時巴斯蒂亞青年軍收咗桑治，先改變佢一生。
桑治好感性咁講：「每次回憶起爸爸，我都忍唔住流眼淚。」
桑治小檔案
出生日期：09/09/1987（22歲）
身高：1米85
國籍：喀麥隆
現效球隊：阿仙奴
位置：防守中場