去台南食擔仔麪，九成人腦中彈出的名字都是「度小月」，有甚麼可以令你變心？1.以干貝汁代味精；2.百年建築連蔡依林都來為MV取景；3.老闆娘風韻猶存女兒更似尹恩惠；4.地踎小吃一躍進軍總統府……你還需要更多理由嗎？
記者、攝影：吳允冲
Model：Ruby
鳴謝：台灣觀光協會、中華航空
台南小吃總壇
一向很怕去這些地標式名店，小吃是屬於街邊的嘛，執到四四正正豈不風味全失？直至見到這百年老厝的風貌，真係唔食都要去睇睇。這間巴閉的擔仔麪店「赤崁」，成立不足8年足以匹敵老字號，一分擔仔麪的天下，全靠把炮的單親媽媽曾鳳玉。她夫家本身賣擔仔麪，01年她離婚後扛上700萬債，還要照顧三個塞豆窿……（下省2000字賺人熱淚故事）。故事峯迴路轉，她在台南租了一間百年歷史的危樓賣麪，由兩張枱開始做起，慢慢將破舊爛屋執吓執吓幻化成古早味老屋；只賣擔仔麪不夠突出，她又破格兼賣魯肉飯，雖被前夫家嗤之以鼻，卻成功殺出重圍，3個月內極速將債還清；及後更將其他台南小吃如棺材板、蚵仔煎等收歸其中，由兜踎麪店變成台南小吃總壇！地道味道加上懷舊包裝，令她成功攻陷總統府，將地踎小吃變成國宴級名物；上年更將版圖擴展至台北故宮，以18元豬油拌飯打響名堂。辣媽說：「我要以鼎泰豐為目標！」真係唔好睇小單親媽媽嘅力量。
干貝汁代味精
OK，這是旅遊版不是人物訪問，感人故事還不及味道實際。辣媽引以為傲的擔仔麪沿用阿嬤秘方，但棄用味精，改同干貝汁提味，湯底以蝦、洋葱、豬骨等熬成，連湯都可飲埋；招牌肉燥每日慢火燉滷，味甜而濃郁，是台南人的口味，甘白豬油溶化在白飯上，每一啖含在嘴裏都唔捨得吞！不止味道正宗，連環境也煞食。百年老厝是日據時代的舊建築，前身是牙科診所，她承租後由大女兒操刀設計，一層一層修葺，懷舊設計甚有味道，每個角落都似電影場景，引來《LivingandDesign》報道，更吸引Jolin來為MV取景。麪正舖靚，但我們更感興趣的是老闆娘不老的秘密，她驕傲地說：「哈哈哈我大女兒都28歲啦！」眾人口中的蝦卷都掉了一半，「怎麼可能？」「以前我一大早起來化妝，工作到晚上，都不卸妝的呀﹗」係真唔係？我可證明，她真人艷過上鏡。美貌歲月偷不走，唔通食擔仔麪真可養顏？
a.赤崁擔仔麵
台南市民族路2段180號
李安思念豆腐之花
台南作為台式小食的祖家，老舖以傳統做法和真材實料而聲名大噪，開枝散葉，同記安平豆花是其中之一，就連大導演李安飛返美國前都話好想食一碗。豆花每日以非基因改造黃豆製作，但因用地瓜粉凝結，質地較實。我最鍾意鮮奶豆花，特別滑溜，配上細細粒的粉圓更有咬口。近來食客搞搞震搞出豆腐花×綿花冰之組合，不在菜單之列，但好多人試，我就覺得完全不搭調！還是食粉圓豆腐花罷啦！
b.同記安平豆花：
台南市安平區安北路433號
TasteofTainan
溫馨提示：台南盛產虱目魚，油煎、煮粥、豆醬、滾湯、做魚丸，不同煮法不同風味，值得一試。
TravelMemo
持BNO或特區護照可辦理網上或落地簽證。中華旅行社：25258316
乘中華航空來回香港與台中清泉崗，票價$1,260起。
中華航空： http://www.china-airlines.com
1港元約兌4.07新台幣（文中價錢已折算港元）
110V，兩扁腳插座
台灣
台南
下周天晴，22-32℃
