幾年前老董成功爭取50萬人上街反23條，被譽為香港民主之父；政務司司長唐公子貴為下屆特首大熱，睇怕都想名留青史，推出天怒人怨政改方案，無疑係幫五區公投造勢，下個月16號投票日若然有驚喜，萬不能漏咗表揚唐公子為公投所出嘅力。
籲好好把握機會
唐公子噚日話政改方案選擇以金黃色做封面係有意思嘅，象徵呢個係香港邁向真民主、終極普選黃金機會，呼籲泛民議員同市民要好好把握，否則錯失呢個黃金機會就恨錯難返。唐公子講到咁直接坦白，八方都唔能夠再隱瞞佢無間道身份，既然佢選擇棄暗投明，一於送佢一程。
公民黨、社民連聯合組成嘅五區公投爭取真普選運動，採用嘅主題顏色正係同政改方案一樣嘅金黃色，月初兩黨舉行真普選大遊行，叫參加者着黃色衫上街，黃金大隊浩浩蕩蕩，十分壯觀。家陣唐公子公開支持真普選運動，硬撐公投，裏應外合之下，呢次顏色革命，仲唔水到渠成？