香港幾乎家家戶戶都有部電腦，除上網了解資訊外，電腦亦成為小朋友做功課的工具。不過現時很多學生只用電腦打機上網，父母只懂以唔俾玩作威脅。徐太讀中一囡囡沚嫣和小學六年級囝囝沚晞同樣愛玩電腦，為免子女掛住玩，徐太亦學電腦，以求母子有共同話題，甚至要比仔女學得快，希望做埋子女的電腦導師，加強親子關係之餘又變相齊齊升呢。
記者：林佩婷
攝影：譚盈傑
考試種菜耕田
徐太從來沒為電腦和子女吵架，全因她一早和子女協商大約每日玩幾耐，限住晒竟不令子女反感，全靠識幫手種菜。「前排Facebook好流行種菜，其他父母唔俾仔女考試同測驗期間玩，我當然都唔俾，但係我會幫手收割，又互送禮物賺分。考完試後成班同學得佢兩個有得升呢，都不知幾威幾感激我。」
徐太話家小朋友讀小一、二就要上網，唔上網反而唔正常。早在五六年前，她利用子女返學時間開始學電腦，幾乎所有親友都有幫手教。與時並進外，她還要快人一步，學埋新出的軟件，當子女學到時變相可以教他們，但更專業的程式就由老公買書自學再教，增加親子關係時在子女面前更有權威性，當然學習過程付出不少代價。「最初唔識亂咁篤，中毒家常便飯，最嚴重咪成部機死咗咩都無晒。之後當然做晒Backup，唔怕又死機。」
替子女守尾門
小朋友最怕父母問長問短、偷睇個人資料等，徐太特地將電腦放在大廳，唔怕子女神神秘秘上網搞搞震。得閒坐低問他們做緊乜，對他們Facebook和Blog瞭如指掌，自己更Add他們的同學，甚至連密碼都有齊，這都是自細協商。「沚晞一向無所謂，沚嫣剛到反叛期，偶然反抗，但我會問吓個網頁好靚點整，從而打開話題。原來小朋友真係好純，佢哋網頁真係會寫真實電話地址等，所以要幫手刪除同教佢哋要小心。」
預防沉迷有計
子女沉迷電腦的確令父母頭痛，但怎樣才叫沉迷？香港家庭福利會青少年服務高級經理胡潔婷話玩電腦好難用時間去衡量，若小朋友出現以下三個症狀，可能出現沉迷傾向。
1.影響生活：玩電腦至影響正常生活，如學業成績、社交及娛樂等。
2.不能自制：若叫小朋友停止時，他會大發脾氣，又或上堂時浮起打Game的畫面等。
3.茶飯不思：經常玩到半夜三更唔願瞓，甚至去到茶飯不思的情況。
若到以上情況，當然要搵專業人士輔導，胡小姐話其實家長亦有很多方法改善兒童玩電腦沉迷傾向，唔應該一味禁玩。「首先將電腦放喺廳，咁就知佢唔會偷偷哋用，最重要係由細開始協商，每日打幾耐或升完Level就要熄機等，以培養佢哋自我控制能力。其次就係一齊上網培養親子關係，建立多方面興趣，除打機仲可以一齊參加親子比賽如拍短片，咁就可以同佢分享網上世界嘅知識，不但有助學習，亦加強思考能力。」
網址： http://www.hkfws.org.hk/healthynet