政府忽然推出政改方案，北京配合做嘢，噚日朝早臨時通知香港傳媒駐京記者，下午4點半人大常委會副秘書長喬曉陽有嘢講。喬老爺講話內容一如所料冇驚喜，總而言之都係叫大家信北京，先通過2012年方案，其他事容後再談。喬老爺照本宣科，冇答問題就收工，臨走時仲望一望手錶，爆咗句：「10分鐘都不到。」京官只要9分幾鐘就KO咗香港人要嘅真普選。
煲呔冇開記者會講政改方案，只係好似05年11月政改方案表決前咁發表電視講話。噚日電視講話據講都係即煮即食，特首辦方面朝早10點鐘左右通知幾個電視台，話下晝兩點鐘特首有重要講話，最好直播出街咁話。八方下晝睇翡翠台《都市閒情》，主持人教緊煮餸，斬瓜切菜之際忽然彈咗煲呔個樣出嚟，隨時嚇親師奶o架。