人民幣升值預期霎時冷卻，昨日大市成交驟降，得番唔夠580億元，有口痕友認為呢個現象唔係幾好，事關市場唔似有乜太壞消息出現，但資金卻忽然「收韁」，係咪有大戶意識到股海有潛在風險，因而聞風先遁？雖然暫時難以證實會有壞消息，但若然成交再縮，似乎應先酌量減磅。
汽車股似已出現退潮迹象，吉利汽車（175）公佈業績後，股價已連跌多日，下跌期間仲要成交唔細，唔建議撈底。即使係半新股中升控股（881）亦受累，昨續跌0.30元，險守12元；其他汽車股表現都一般，汽車股成個升浪唔通已經玩完？
體育用品股仍熱炒，361度（1361）及匹克體育（1968）正展開尋頂之旅，特步國際（1368）穩企6.37元收市，正沿升軌伺機突破，下站可見7元，可設止蝕位6元入市。特步去年純利達6.5億元人民幣，又與伯明翰環球（2309）合作贊助球會球衣，有助集團品牌打入外國市場，故其可塑性應比其他體育用品股稍高一籌。
方星俠