可以肯定香港人是最爛命最爛玩的旅客，明知泰國混戰，仍無視旅遊黑色預警。泰國軍警終於開槍，佛都有火，四面佛有四面火，但都抵不住軍火。拜乜都假，拜金的他信搞到國家雞毛鴨血，尚武的阿披實忍不住一時之氣，曼谷失控，潑水都洗唔清。到底他信抑或阿披實才是泰奸？這麼一亂，靠旅遊搵食的泰國通被迫食白果。以往標榜泰輕鬆，今趟明白泰艱難。只能寄望，遊客個個都是泰善忘。
曼谷變死城，最開心的又是上海，遊客想唔去世博都難。上海卻限制夜遊人必須在十一點前打道回府，措施適用於遊客。五月世博，非常接近「五月卅五日」，市政府發出黑色預警，絕不出奇。六月那一天，黑衫軍現身世博場館的話，武警會不會泰軍上身？
遊泰事小，投資事大。專家評論員又試指點江山，認為資金會流出曼谷，轉來香港避風險。香港又試水浸啦，到時地產炒到盡，話唔埋連墳地都會落鑊。明火陰火，各顯炒功，香港這條飛龍改造得及時，那三條尾係真正的水尾，食水尾都咁發，曾俊華立功了，試問四小龍中，邊個夠香港威？
樓價再滾下去，我出街都要戴頭套了，否則點敢行商場。地產經紀才俊們，饒過我吧，橫睇，我點都唔似叠水溫州大嬸耶。
（代郵：黑蒜汁對糖尿病和血壓高有效，讀者過千度近視，無濟於事。藍莓精華我試過，效用微，介紹唔過。）