台灣藝人陳建州（黑人）自從今年2月喺紐約嘅NBA球場上，當眾跪地向拍拖10年嘅女友范瑋琪（范范）求婚，兩人經常被追問婚期。噚日范范出席台灣一個慈善活動，終於透露婚期定喺出年農曆新年，今年11月會舉行訂婚儀式。
原來11月7日係范范嘅媽咪生日，范范話希望喺呢日前後訂婚，當係幫媽咪祝壽。問到婚禮會唔會大搞？佢話唔想大事鋪張，佢話：「我甚麼都OK，但一定要有尖尖的教堂，下午請牧師證婚。」聽聞佢哋因為籌備唔切婚禮而改到出年，訂婚其實純粹同大家有個交代喎！
「希望生女兒」
身為基督徒嘅范范同黑人日前接受專訪時，被問到係咪要嚴守婚前唔可以有性行為嘅戒律，當時佢哋默認話男女朋友該發生嘅嘢早就發生咗。不過噚日再問范范時，佢竟然答非所問咁話：「我們要活出基督教的光彩。」范范話仲未準備好做陳太，有時朋友稱呼佢做陳太，佢都會覺得唔開心。講到生仔問題，范范話結婚之後再算，佢話：「如果要生，希望可以生女兒。」