波蘭總統卡欽斯基同多名領導層坐嘅飛機日前失事，全機人不幸身亡，令好多波蘭人心傷，在港嘅波蘭裔中大社會學系一年級生WitoldSmieszek都深表哀痛，但佢相信喺民主制度下，新領導層可以好快上場，管治好國家，望同胞盡快振作。
教育局噚日頒發獎學金畀441名就讀學士學位或研究生嘅本地及非本地生，表揚佢哋學業成績好兼有領導才能，本地生有4萬蚊，非本地生有8萬蚊。Witold係得獎者之一，佢話總統同政要遇難，自己都好傷心。Witold父母喺深圳工作，佢曾喺內地住咗5年，畢業後唔會返波蘭，想去美加再進修，增值好自己先貢獻祖國。