皇仁書院名人校友一籮，係會考十優狀元搖籃，但咪以為皇仁仔好醒，校友之一嘅候任中大校長沈祖堯話，佢哋其實好土，絕大部份皇仁仔讀書時愛情交白卷，佢讀大學先識追女仔，「遲咗人幾年！」
不贊成皇仁收女生
皇仁仔理應好艷福，事關俾女校包圍，左有庇理羅士，右有聖保祿學校，香港真光在山上，何東則喺左近。不過70年代就讀皇仁嘅沈祖堯話，由於大部份同學嚟自草根家庭，冇錢買新校服，老老土土着條吊腳褲返學，女仔見到都睇唔上眼啦，「男生好土吓，雖然有搞聖誕舞會，但我哋掛住食嘢，多過追女仔。」
沈祖堯講到和尚寺生活咁dry，八方就唔多信嘞，皇仁校友賭王妻妾一群，不知幾精采；另一校友華叔後生時有談婚論嫁女朋友，可惜女朋友過身，佢終身不娶，正一癡心情長，係女都感動啦，沈祖堯怨識女仔無門，恐怕係學藝不精啫！
唔少男校預科會收女生，一直都盛傳皇仁有女生入讀，沈祖堯同一班老鬼噚日興高采烈討論究竟有冇「皇仁女」，後來有人權威地指冇收過，至多係邀請女校學生嚟上堂，不過其他人半信半疑，質疑啲女生係追到上門，又指預科收女生嘅英皇書院破壞男校傳統。
沈祖堯則話如果皇仁收女生，可能不歡而散，「女生喺度好難生存，成班波牛，又冇女廁，得幾個女仔喺度會好凄凉。」沈祖堯冇作大，事關佢讀書時，學生挑戰校規激過80後，有學生竟然爬過圍欄，經旁邊嘅大坑渠逃學；夜晚返去參加天文學會名為觀星，實際係由得支望遠鏡睇星，人卻去咗踢波。
本周五周六開放日
以前皇仁跟英國傳統，正門只俾高年班學生出入，初中生要經側門返學，「嗰度旁邊係垃圾池。」沈祖堯話覺得好唔公平，「試過專登遲到，覺得行正門好威。」家已冇呢個做法，皇仁今個星期五、六有開放日，去參觀梗係唔使行側門，經正門入去無任歡迎。
mailto:[email protected]