名牌直資德望學校中學部再爆出人事風波，備受批評嘅校長陳馨罕有喺學期中「跳車」，上月底同學校講拜拜，結束喺德望25年生涯。有知情人士話，陳校長係補錢即走，如此決絕，令事件更加撲朔迷離。舊年8月先由商界重返該校嘅女副校長Anita陳，都喺同一時間離開。
陳馨06年接任做校長，舊年有人向校監投訴校政管治不善，搞到多名資深教師黯然離開，影響教學質素。德望副校長李耀文噚日回應，陳校長係以私人理由辭職，同篤背脊事件無關，至於係咪補錢走，無可奉告咁話。佢又話，陳副校都係以私人理由辭職。有教育界人士指，鮮見教師會喺學期中離開，更何況校長？