成龍嘅荷李活新片《一屋特工隊》（TheSpyNextDoor）喺復活節檔期4月1日喺香港上映，不過上次同王力宏合作嘅內地電影《大兵小將》排喺賀歲檔咁好嘅檔期，香港埋單計數都係收190萬，相反內地就收成1億5千幾萬人民幣。其實成龍近幾年啲戲喺香港上映嘅票房都唔係太好。
不如港產片
今次成龍唔做大兵轉去做特務，故事講喺美國中央情報局做特工嘅佢，準備做三個細路嘅後父，畀呢班細路整蠱而引發出嚟嘅古仔。笑料、動作都有應該開正大哥嗰瓣，仲要係荷李活片，不過票房都係冇乜起色。截至前日，《一》片上映11日票房只有120萬。
唔計其他荷李活大片，今次佢套《一》片，相比都係上映咗11日嘅港產片都不如，好似林超賢套《火龍》收367萬、王晶嘅《美麗密令》收443萬。就連唔係咁俾人睇好，由張學友同久休復出嘅湯唯主演嘅《月滿軒尼詩》都收244萬。