小妹身邊唔少姊妹出年拉埋天窗，呢輪四圍張羅酒席，但係齋睇啲菜單，冇得試食都唔知啲菜夠唔夠水準，失禮人就弊啦。稻香酒樓嘅公關karen打畀小妹話，佢哋第一次舉辦囍宴婚嫁展，梗要搞得好睇，即日起準新人透過ESDlife登記參加（ http://www.esdlife.com/soloemail/cheers/20100331/default.asp），可以用68蚊二人同行優惠價試酒席菜式。
試菜？係咪試幾啖？佢笑笑口話，係好似擺酒咁成圍酒席試，有成九道菜，包括乳豬全體、玉掌扣好巿、清蒸大星斑等，仲有埋鴛鴦美點，限額240人。
咁又幾着數，68蚊平均每人都係34蚊，飲一餐做人情都要5嚿水，有冇附帶條例逼人要喺酒樓訂酒席先？karen話，係有一個附帶條件，就係一對準新人尚未預訂酒席，「食完之後，佢哋唔係一定要幫襯。」
有新娘化妝示範
karen話，現場仲有新娘新郎化妝set頭等造型示範，每個參加者又獲贈酒樓嘅美食通行證一本，內有20款飲食優惠，如食滿400蚊減50蚊嘅優惠券，「仲有抽獎助興，有機會獲得音樂人張佳添炮製嘅婚禮進行曲連MV服務。」又食又拎喎。婚嫁展日期本月17、18日喺銅鑼灣告士打道311號皇室堡5樓迎囍酒樓舉行。查詢：21289889。計小妹話，係咪幫襯到時先算，兩個人68蚊食一餐都幾化算。
電郵：mailto:[email protected]