去年底畫《五區公投》漫畫，義助宣傳公投嘅漫畫家Cuson本來計劃按事態發展，繼續以漫畫為公投造勢，可惜佢另有要務，唔得閒畫《五區公投》漫畫，「絕筆」咁話。
Cuson透露正畫另一本更重要嘅漫畫，八方問佢乜嘢漫畫咁緊要，佢壓低把聲話：「畫港女，即係我老婆。」以港女做漫畫題材，隨時敏感過公投，仲要擺自己老婆上枱，八方恐怕Cuson下場比撐公投更慘烈，問佢做乜咁睇唔開，佢話：「其實都係畫日常生活嘅趣事，應該冇乜問題啩。」
呢本新港女漫畫預計今年書展出街，因此Cuson要全力趕工，佢話如果順順利利，時間許可嘅話，可能幫忙為公投做宣傳，「唔夠時間創作古仔嘞，參考新聞嚟畫，可能仲有時間。」