中銀監主席劉明康叫銀行唔好胡亂放貸，內地閂水喉，早已中港兩邊走嘅投資者，要借錢買樓其實唔太難，今年頭兩個月投資移民申請急增125%，帶嚟450億元投資。
有張香港身份證除咗係身份象徵，亦攸關人身甚至係資金自由，投資650萬銀買樓又得、炒股又得，中銀監要管，都管不到佢哋南下向香港銀行融資借錢，再換成人民幣拎番內地。
個體戶「息魔」難纏，地方政府亦頭痛點喺中央打壓樓市下開拓新水源。鐵道部剛剛將全國鐵路規劃編制，地方政府已急不及待爭取新高鐵路線，重慶、西安等城市都高呼要做高鐵樞紐。
產能過剩情況肯定會喺可見將來出現，特別係冇需要興建咁高速鐵路嘅二三線城市。相反，具投資價值嘅項目好似京滬高鐵，已吸引中行斥資60億元人民幣入股成為第五大股東。京津高鐵一年蝕足8個億，睇嚟地方政府將紛紛因頂唔順高鐵高財務負擔，焗住搵人接燙手山芋。
揸廣深鐵路要有耐性
有齊中港美上市平台可供注入嘅，只此一家得廣深鐵路（525）。不過呢場係國有資產同基金股東嘅持久戰，革命尚未成功，霸菱已經頂唔順，尤其有見其他板塊表現出色，最近終於減持902萬股，持股比例由5.03%減至4.4%；4月NorthernTrust亦減持至4.98%。
睇廣深鐵路，充滿昔日海爾電器（1169）嘅影子，05年海爾集團將洗衣機資產注入海爾電器，德銀以5.57億元從中建電訊（138）手上收購近24%股權。其後重組步伐冇預期咁快，股價到08年原地踏步，德銀終於同意以7.8億元賣畀青島海爾。非我族類持股者走後重組工作啟動，股價經一輪震盪後升到今時今日。假如你嫌棄廣深鐵路死都唔郁，唔該借開，唔好揸住手貨阻住地球轉。
胡孟青