【本報訊】昨晚甲一籃球聯賽兩仗在石塘咀體育館上演，球員冇地方熱身之餘，球迷亦冇位可坐；永倫主將香振強坦言：「有點downgrade（貶低）了甲一的感覺。」
昨晚因傷未能上陣的阿香，見永倫隊友以87:41勝愉園仍木無表情，原來是不滿球場安排：「作為球員，無論在那個場都照打；但這個場完全唔掂，觀眾少、氣氛欠奉，與打學界及街場冇分別，搞吓搞吓甲組唔似甲組。」昨日賽事免費入場下引來百多名觀眾，因座位不足，部份要坐在籃底睇波。
更糟是賽前有人租用球場打羽毛球，令雙方球員沒有地方熱身；香港籃總總幹事朱春生表示，因經費不足，在今季28場初賽中，頭兩天比賽及部份護級賽事，會在彩虹道及石塘咀舉行，其餘會回師灣仔修頓室內場。
昨晚尾場賽事，南華以111:72勝遊協。