皇仁書院前身係創辦於1862年嘅中央書院，孫中山都讀過。為慶祝後年創校一個半世紀，舊生會計劃籌募500萬元作為慶祝活動經費。舊生會噚日公佈同中大歷史學系合作編寫皇仁與香港社會發展史，預計要花30個月先完成，請校友講述校園生活同野史。
有錢剩撥入教育基金
籌款活動噚日舉行啟動儀式，校方播出07年訪問校友賭王片段，中氣十足嘅賭王話，13歲時家道中落，父親投資失利，家中值錢物品都典當晒，連學費都畀唔起，佢惟有發憤讀書攞獎學金。06年華叔接受訪問，華叔大讚皇仁「消極不干預」政策，指初中幾年冇交功課都冇人理，交咗作文冇派返畀學生，真係free到爆。
10年前慶祝140周年校慶，校友聚餐開足180席，舊生會會長陸偉雄噚日話150周年校慶規模應該更大，呼籲全球校友都返嚟參加，期望賭王同華叔都可成為座上客，若校慶基金有錢剩，會撥入教育基金，造福師弟。