房車要玩運動感，跑車又話要添貴氣，潮流告訴大家，家汽車形象都唔可以係獨沽一味。你睇睇Mazda6可以玩肌肉感，玩運動化甚至豪華，樣樣都可以玩到出神入化。今日望住性格豐富嘅Mazda6Facelift版，似乎再次印證呢個道理。
記者：趙慧敏
攝影：楊錦文
Model：Vanessa@PureModels
車頭大執樣
Mazda6上次改款係08嘅事，以菱形做主題，令人眼前一亮，不過睇耐咗都要有啲新鮮感，Facelift就嚟得啱啱好。我睇過車廠一早公佈嘅Mazda6Facelift版，全車增加包圍、車尾擾流、頭燈配備HID燈，當堂流晒口水，梗想第一時間一睹其真身。終於等到佢嚟香港，試車係基本版！失望當然有，但見到呢款2.5引擎五門揭背基本版後，發現原來基本版早已集改良嘅精華於一身。外觀上以車頭位置改動最大，萬事得家族式笑臉鬼面罩換咗設計，令整個車隊形象更立體，而霧燈嘅氣壩位置外形保持菱角，但就將菱形拉長，配合增加嘅電鍍配飾、全套SAP擾流組件，令車頭霸氣貴氣兼備。其實豪華版配備嘅前置霧燈亦由原來嘅菱形改為圓形，應會如鷹眼般更有殺氣。
車廂玩戲法
要講豪華，車櫳自然係焦點所在，廠方宣傳重點嘅ZOOM-ZOOM模式，只要一撻車，中央顯示屏及錶板燈會由暗至亮着起，標榜戰機式起動顯示，型格程度，任何人都會為它傾倒。真皮座椅似乎已經成為指定規格，但無諗過呢個車價嘅駕駛座，都配備三組記憶功能，豪房規格都有埋，點夠佢嚟。雖然軚盤撥片功能只屬豪華版規格，基本版欠奉，但因為傳動屬5前速+/-自動波箱，要一過手波癮，亦唔係難事。乘客感受當然無忽視，車廂佈局大玩戲法，令整個空間感更寬敞，連後座乘客位腳部空間都增加20mm，當然係長腿一族喜訊。至於性能，Mazda6採用MZR直四氣缸鋁合金引擎，能爆發170匹馬力，由於引擎兼配備S-VT連續可變活瓣正時技術，自動調校進氣活瓣嘅開合時間，除令動力輸出更澎湃外，對省油亦有很大幫助。而Facelift版Mazda6胎軨亦經過全新設計，豪華版與基本版分別為18吋及17吋兩款不同規格。雖然Mazda6Size唔細，但操控容易，只要稍具駕駛經驗嘅人，相信都可輕鬆駕馭，無論快速公路又或者在彎多路窄嘅山路行走，穩定性都十分強，加上超班豪華設備，日圓滙價咁鬼高，代理仲係賣緊廿零萬，點會唔心動。
規格
引擎：2,488cc鋁合金MZRS-VT直四引擎
馬力：170ps/6,000rpm
扭力：23.0kg-m/4,000rpm
傳動：5前速+/-自動波
售價：$239,990起
查詢：萬事得汽車（28931112）
