上周中國移動（941）帶起大市高潮，投資情緒即時改善，股評人位位升格成股神，埋單計數升兩三成。其實前兩三個星期合埋眼買入一隻藍籌或國企股，都要好「黑仔」至搵到隻唔升嘅。投資者要保持冷靜，小心殺完熊仔後回調，未入場要買貨不妨等等。
不過，若然真係錯失咗呢千五點升浪，就要加倍努力至搵到平嘢買。記得此欄早前同大家分析過，可往上游搵落後股，例子有中興通訊（763）的供應商摩比發展（947），中興公佈業績後由摩比接力炒上；其次有申洲國際（2313），佢係日本UNIQLO嘅生產商，同裕元集團（551）異曲同功。
今日同大家講隻老牌工業股威發國際（765），早年做塑膠公仔同聖誕裝飾品起家，06、07年公司平均都賺三千幾萬元，08年一場金融海嘯勁蝕七千幾萬元，主要係炒燶Accumulator。
大客在手定單有保障
好彩威發有穩定業務頂住，去年上半年已扭虧，除咗毛利升，Accumulator所接嘅貨已升番唔少，重估後公司資產淨值有望提高。
經一事長一智，相信公司會更專注本身同最球最大玩具生產商Bandai嘅合作。威發已成為Bandai指定代工之一，玩具產業少受經濟影響，成為佢嘅上游可謂長做做有，估計未來一兩年起碼有兩成以上增長。
公司09年上半年因有投資收益令業績轉虧為盈，下半年核心業務利潤應該恢復成為盈利增長引擎，全年盈利可重見天日，目標應可達3800萬元，以2.8億股已發行股份計算，每股盈利達0.135元，保守計即使下半年冇增長，市盈率都唔夠7倍。
業績將公佈，以07年全盛時期全年派息6仙計，加埋本業配合內地經濟高增長市場，手頭現金超過5000萬元，有條件派高息，若真係派足6仙，息率有近7厘，老牌工業股勝在大股東持重貨，賺到派畀自己同時益街坊，識貨之人都要有耐性。
胡孟青