一個星期之內，曼聯擁躉由天堂邊緣跌落地獄大門。三月三十一日之前，曼聯還有希望破紀錄，連續四屆獲得英超冠軍，再度進入歐冠盃決賽；今季雖然走咗C朗，但朗尼狀態大勇，成為入球機器，對手聞風喪膽，賣走C朗好似對整隊全無影響。
點知天有不測之風雲，拜仁慕尼黑來一次大報復，將一九九九年嘅烏氣盡情吐出，反敗為勝，在落後逆勢之下，憑作客入球氣走曼聯，輸波都昂然進入四強，兼且令到朗尼受傷，嚇死英格蘭領隊卡比路；而曼聯球員因為身心疲累，上次主場對住車路士，全程落於下風，即使杜奧巴入球係越位，但曼聯顯然處處走慢一步，敗也固宜。曼聯今季已經輸咗七場，歷史上從無一季輸七場嘅球會可以取得冠軍，今個周末對住十分硬淨嘅布力般流浪，師老兵疲，士氣受損嘅曼聯倘若再失分，可以講拜拜咯。
曼聯在歐冠盃出局，對佢可能係好事嚟，否則再要砌落去嘅話，在英超就會益晒已在歐冠盃玩完嘅車路士。家大家齊齊聚焦英超聯賽事，對曼聯不無好處。即使打入決賽，曼聯好可能對住巴塞隆拿，咪又好似舊年咁樣，輸波收場囉。巴塞對阿仙奴一役，足球天王誕生，就係阿根廷人美斯，廿二歲球星獨食射入四球，球球精采。阿仙奴門將直認美斯可以為所欲為，無人可以阻擋，雲格指阿仙奴輸畀一支超級球隊及一個超級球員，前阿根廷國腳，與馬勒當拿同輩份嘅阿迪尼斯對BBC講：「美斯來自其他星球！」美斯只要今年帶領阿根廷贏世界盃，就可以奠定球王地位，成就跟比利、馬勒當拿並稱。踢歐冠盃，一場射入四球嘅前鋒，美斯並非第一人，佢嘅前輩雲巴士頓、舒夫真高（AC米蘭）、西蒙恩沙基（拉素）、雲尼史達萊（曼聯）以及摩納哥嘅Prso都試過。但係入波入到好似打機，一個人玩弄對方守衞於掌上嘅，只有美斯一人，朗尼望塵莫及，C朗未到佢個level。諗諗吓，阿根廷踢世界盃有三個頭號射手，就係美斯、希古恩與泰維斯，真係嚇死人，臭馬/肥馬/馬勒當拿如何排陣？阿根廷踢外圍賽好渣啫噃，入到決賽周，面對西班牙或巴西，球迷諗吓都口水流。